ზამთრის პირველი ყინვების დადგომისთანავე, საქართველოში, განსაკუთრებით კი მაღალმთიან რეგიონებში, წყალმომარაგების სისტემების დაზიანების შემთხვევები საგრძნობლად იმატებს. „თერმოინდუსტრიას“ გუნდს ხშირად უწევს ისეთი შედეგების აღმოფხვრა, რომელთა თავიდან აცილებაც წინასწარი მომზადებით მარტივად იყო შესაძლებელი.
რატომ არის გაყინული მილი სახიფათო?
წყლის მილები სისტემაში დაგროვებული წნევის გამო სკდება. როდესაც მილში ყინულის საცობი ჩნდება, წყლის ნაკადი იკეტება. ყინულსა და დაკეტილ ონკანს შორის მოქცეულ სითხეს სხვა წასასვლელი აღარ აქვს, ამიტომ გაფართოებული მასა მას აწვება. სწორედ ეს დაგროვილი ძალა ხეთქავს მილს იმ მონაკვეთში, სადაც ყინული საერთოდ არ არის.
ყველაზე მძიმე შედეგი მაშინ დგება, როცა ტემპერატურა მატულობს და ყინული დნობას იწყებს. ამ დროს დაზიანებული ადგილიდან წყალი გაჟონვას იწყებს, რაც სახლში წყალდიდობას იწვევს და კედლებს, იატაკსა და ავეჯს აზიანებს.
რომელი მონაკვეთებია გაყინვისადმი ყველაზე მოწყვლადი?
გაყინვის საფრთხე პირველ რიგში იმ მილებს ემუქრება, რომლებიც გარე კედლებთან ახლოს გადის ან ისეთ ადგილებშია განთავსებული, სადაც გათბობა საერთოდ არ აღწევს. მაგალითად, სარდაფები, სხვენი და ავტოფარეხი სწორედ ის ზონებია, სადაც წყლის გაყინვის ალბათობა ყველაზე მაღალია. საგულისხმოა ისიც, რომ ძველ შენობებში მილები ხშირად სათანადო იზოლაციის გარეშეა გაყვანილი, რაც პრობლემას კიდევ უფრო ამწვავებს.
გარდა ტემპერატურისა, დიდ როლს თამაშობს წყლის უმოძრაობაც. როდესაც მილში წყალი მუდმივად არ მოძრაობს, ის გაცილებით სწრაფად იყინება. სწორედ ამიტომ, ყველაზე ხშირად მილები ღამით ზიანდება, როცა მოსახლეობა წყალს ნაკლებად მოიხმარს. ასევე პრობლემურია ეზოში ზედაპირულად ჩაყვანილი სისტემები, რომლებიც პირდაპირ კონტაქტშია ცივ ჰაერთან.
როგორ მოამზადოთ წყლის სისტემა ზამთრისთვის – პრევენციული ნაბიჯები
სისტემის მომზადება იდეალურ შემთხვევაში შემოდგომაზევე უნდა დაიწყოთ. პირველ რიგში, ყურადღება გარე ონკანებს მიაქციეთ. თუ ეზოში გაქვთ ონკანი, რომელსაც ზაფხულში ბაღის მოსარწყავად იყენებდით, ზამთარში მისთვის წყლის მიწოდება სრულად უნდა გადაიკეტოს. ამისთვის სახლის შიგნით არსებული სარქველი უნდა დახუროთ, ხოლო გარე ონკანი გახსნილ მდგომარეობაში დატოვოთ, რათა მილში დარჩენილი წყალი სრულად დაიცალოს. თუ ონკანზე შლანგია მიერთებული, ის აუცილებლად მოხსენით და თბილ ადგილას შეინახეთ.
მილების იზოლაცია კიდევ ერთი მნიშვნელოვანი ნაბიჯია. იმ მონაკვეთებზე, რომლებიც გაუთბობელ სივრცეებში გადის, სპეციალური თბოსაიზოლაციო მასალები უნდა გამოიყენოთ.
მილების მასალის შერჩევისას ყურადღება მიაქციეთ მილის დიამეტრს და თქვენს რეგიონში არსებულ კლიმატურ პირობებს. ასევე, კარგად დაათვალიერეთ სახლის საძირკველი და გარე კედლები, რადგან ნებისმიერი ბზარი, საიდანაც ცივი ჰაერი აღწევს, უნდა ამოავსოთ.
„თერმოინდუსტრია“ ამ მიმართულებით ისეთ გამოცდილ ბრენდებს გვთავაზობთ, როგორებიცაა Coolflex, DINAMIK და Paflex. განსაკუთრებით პრაქტიკულია ალუმინის შრით დაფარული და თვითწებადი იზოლაციები, რაც მათ დამონტაჟებას საგრძნობლად ამარტივებს.
როგორ დავიცვათ წყლის სისტემა მაშინ, როცა განსაკუთრებული ყინვაა მოსალოდნელი?
როცა სინოპტიკოსები განსაკუთრებულ ყინვებს აანონსებენ, დამატებითი ზომების მიღებაა საჭირო. ერთ-ერთი ყველაზე გამოცდილი ხერხი ონკანიდან წყლის მცირე ნაკადით დინებაა.
ღამით, როდესაც ყინვა პიკს მიაღწევს, რომელიმე ონკანი ისე გახსენით, რომ იქიდან წყალი წვეთ-წვეთობით მოედინებოდეს. მუდმივი მოძრაობა წყალს გაყინვის საშუალებას არ აძლევს. ეს მეთოდი განსაკუთრებით გამოსადეგია იმ მილებისთვის, რომლებიც ყველაზე ცივ კედლებში გადის.
ამას გარდა, კარგი იქნება, თუ სამზარეულოსა და აბაზანის კარადების კარებს ღამით ღიას დატოვებთ. ნიჟარის ქვეშ გამავალ მილებამდე ოთახის თბილი ჰაერის თუ მიაღწევს, კომუნიკაციების გაყინვის რისკი შემცირდება.
რაც შეეხება გათბობის სისტემას, ეცადეთ ტემპერატურა სახლში თანაბრად შეინარჩუნოთ. თუ სახლიდან რამდენიმე დღით მიდიხართ, გათბობა სრულად არასოდეს გამორთოთ. დატოვეთ ის მინიმალურ ნიშნულზე, რათა შენობაში სითბო შენარჩუნდეს და წყლის მილები არ დაზიანდეს.
როგორ უნდა იპოვოთ წყლის მილის გაყინული ადგილი?
იმისთვის, რომ პრობლემა მოაგვაროთ, პირველ რიგში, გაყინული მონაკვეთი უნდა იპოვოთ. ეს ყოველთვის მარტივი არ არის, თუმცა არსებობს რამდენიმე ნიშანი, რომელიც ამოცნობაში დაგეხმარებათ. თუ წყალი მხოლოდ ერთი ონკანიდან არ მოდის, მაშინ პრობლემა სწორედ ამ მონაკვეთშია და ის ადგილი უნდა შეამოწმოთ, რომელიც ამ წერტილის წყლით ამარაგებს. იმ შემთხვევაში თუ წყალი მთელ სახლში შეწყდა, მაშინ ცენტრალური მილია გაყინული.
მილების დათვალიერებისას ყურადღება მიაქციეთ მათ ვიზუალს. ხშირად გაყინულ ადგილას თეთრი ნაფიფქი ჩნდება ან წყლის მილი, სხვა მონაკვეთთან შედარებით, უფრო ცივია. საგანგაშო ნიშნად მიიჩნევა ფორმის ცვლილება. თუ სადმე მილი გამობერილია, ეს ნიშნავს, რომ მის შიგნით წარმოქმნილმა ყინულმა მისი კედელი უკვე დააზიანა.
რა უნდა მოიმოქმედოთ, თუ წყალი უკვე გაიყინა?
თუ ონკანს გახსნით და წყალი არ მოდის ან მხოლოდ სუსტად წვეთავს, დიდი ალბათობით მილი უკვე გაყინულია. ასეთ დროს პირველ რიგში უნდა იცოდეთ მთავარი სარქვლის ადგილმდებარეობა, რათა საჭიროების შემთხვევაში წყლის მიწოდება სწრაფად გადაკეტოთ. თუ მილი უკვე გახეთქილია, ეს ქმედება დატბორვისგან დაგიცავთ.
იმისათივის, რომ სახლში წყალმომარაგება აღდგეს, აღსადგენად გაყინული ადგილი უნდა გაალღოთ, თუმცა გათბობისას არავითარ შემთხვევაში არ გამოიყენოთ ღია ცეცხლი, სანთებელა ან სხვა მსგავსი საშუალება. ეს არა მხოლოდ საშიშია, არამედ თავად მილსაც აზიანებს. უმჯობესია გამოიყენოთ თმის საშრობი ან ცხელ წყალში დასველებული პირსახოცები. გათბობა ყოველთვის ონკანთან ახლოს მდებარე მონაკვეთიდან დაიწყეთ და ნელ-ნელა მიჰყევით მილს. ასე გამდნარ წყალს გამოსასვლელი ექნება და სისტემაში ზედმეტი წნევა არ დაგროვდება.
როდის უნდა მიმართოთ სპეციალისტს?
არსებობს მომენტები, როცა დამოუკიდებელი მცდელობა მხოლოდ დამატებითი ზიანის მომტანია. თუ გაყინულ ადგილს ვერ პოულობთ ან ის ისეთ მონაკვეთშია, სადაც ხელი არ მიგიწვდებათ (მაგალითად, იატაკქვეშ ან კედლის სიღრმეში), სჯობს მაშინვე პროფესიონალს დაუკავშირდეთ. არასწორმა მოქმედებამ შესაძლოა მილი დააზიანოს და უფრო მძიმე დაზიანება გამოიწვიოს.
განსაკუთრებით საყურადღებოა მილზე არსებული ბზარები ან დეფორმაციები. თუ ასეთ რამეს შეამჩნევთ, წყლის მიწოდება დაუყოვნებლივ გადაკეტეთ და სპეციალისტს დაუკავშირდით. ის შეაფასებს დაზიანების ხარისხს, შეცვლის საჭირო ნაწილს და სისტემას უსაფრთხოდ აამუშავებს. ასევე, თუ პრობლემა ყოველ წელს ერთსა და იმავე ადგილას მეორდება, ეს სისტემურ ხარვეზზე მიანიშნებს და მისი მოგვარება მხოლოდ კვალიფიციურ გუნდს შეუძლია.
გამოცდილება გვიჩვენებს, რომ სისტემის წინასწარი მომზადება ბევრად უფრო გონივრული არჩევანია, ვიდრე მოულოდნელი დაზიანებების აღმოფხვრა. მილების დროული შეფუთვა, სახლის გარე კედლების დათვალიერება და საჭიროების შემთხვევაში წყლის მცირე ნაკადით დინება სწორედ ის მარტივი გზებია, რომლებიც ზამთრის სირთულეებისგან დაგიცავთ. თერმოინდუსტრია მუდამ თქვენს გვერდითაა, რათა თქვენს სახლში სითბო და სიმშვიდე ნებისმიერ ამინდში შენარჩუნდეს