„თერმოინდუსტრიას“ გუნდს ყოველდღიური საქმიანობის პროცესში მომხმარებლებისგან ხშირად გვესმის კითხვები იმის შესახებ, თუ რატომ ეცემა წნევა წყალმომარაგების სისტემაში, რა იწვევს უჩვეულო ხმაურს ან რატომ ჩერდება აგრეგატი მოულოდნელად. სწორედ ამიტომ გადავწყვიტეთ, ერთ სივრცეში მოგვეყარა თავი ყველა იმ საყურადღებო ნიშნისთვის, რომელთა იგნორირებაც არ ღირს.
გადახურება
წყლის ტუმბოს დაზიანების ერთ-ერთი ყველაზე ხშირი მიზეზი გადახურებაა, რასაც, თავის მხრივ, რამდენიმე ფაქტორი იწვევს. მაგალითად, როდესაც გარემოში ძალიან ცხელა ან აგრეგატი ცუდად განიავებად ადგილზეა დამონტაჟებული, მას მუშაობა უჭირს და დამატებით სითბოს გამოყოფს. ამას ემატება ზეთის დონის საკითხიც, თუ ტუმბოში არასაკმარისი რაოდენობის ზეთი ასხია, კომპონენტები ერთმანეთს ეხახუნება და ტემპერატურა მატულობს.
ზოგჯერ ამ პრობლემის სათავე თერმოსტატია, რომელიც გაგრილების პროცესს ვეღარ არეგულირებს. გადახურების დროს ტუმბო უცნაურ ხმას გამოსცემს, კორპუსი შეხებისას ზედმეტად ცხელია, ხოლო წყლის ნაკადი — შესამჩნევად სუსტი.
ძრავა რომ არ დაიწვას, აუცილებელია ზეთის დონის შემოწმება და იმის კონტროლი, რომ მოწყობილობას ჰაერი თავისუფლად მიეწოდებოდეს. თუკი დიაგნოსტიკისას თერმოსტატის დაზიანება გამოვლინდება, მისი შეცვლა ერთადერთი გამოსავალია.
წყლის გაჟონვა
გაჟონვა საკმაოდ გავრცელებული პრობლემაა და მას ძირითადად ბუნებრივი ცვეთა იწვევს. დროთა განმავლობაში შუასადებებსა და მანჟეტებს ელასტიკურობა აკლდება, ისინი სკდება და წყალს ატარებს. ასევე, მუდმივი ვიბრაციისგან შეიძლება შესაერთებლები მოეშვას და წყალმა ნაპრალებიდან გამოჟონოს. გასათვალისწინებელია კოროზიაც, რომელიც ნელ-ნელა აზიანებს ლითონის კორპუსს.
თუ შეამჩნევთ, რომ წნევა დაეცა ან ტუმბოს ხმა შეიცვალა, აუცილებლად დაათვალიერეთ იგი ვიზუალურად. სისველის აღმოჩენის შემთხვევაში, პირველ რიგში, გადაამოწმეთ შესაერთებლები და კარგად მოუჭირეთ მათ. იმ შემთხვევაში, თუ წყალი მაინც ჟონავს, სავარაუდოდ, შუასადებებია შესაცვლელი ან სპეციალური ჰერმეტიკის გამოყენება დაგჭირდებათ.
დაბალი წნევა
დაბალი წნევა ის პრობლემაა, რომელიც მომხმარებელს ყველაზე მეტ დისკომფორტს უქმნის, რადგან წყალი ონკანში ძალიან სუსტი ნაკადით მოედინება. ამის მიზეზი ხშირად მილებში დაგროვილი ნალექი და ჭუჭყია, რაც წყლის გატარებას აფერხებს. შესაძლებელია დაზიანებული იყოს იმპელერიც — ტუმბოს ის ნაწილი, რომელიც ბრუნავს და წყალს ამოძრავებს. კიდევ ერთი გავრცელებული მიზეზი სისტემაში ჰაერის დაგროვებაა. ამ დროს მილებში წყლის ნაცვლად ჰაერია გაჭედილი და წნევაც ეცემა.
სიტუაციის გამოსასწორებლად სისტემა დაგროვილი ნადებისგან უნდა გაიწმინდოს და იმპელერიც უნდა შემოწმდეს. თუ მიზეზი ჰაერია, მაშინ სპეციალური სარქველიდან ზედმეტი ჰაერი უნდა გამოიდევნოს.
ხმაური და ვიბრაცია
ტექნიკურად გამართული წყლის ტუმბო მუშაობს თანაბრად და ზედმეტი ხმაურის გარეშე. ამრიგად, თუ გესმით ჩხარუნი ან ძლიერი გუგუნი, ესე იგი რაღაც რიგზე ვერ არის. ხმაურს ხშირად მოშვებული ჭანჭიკები ან სხვა დეტალები იწვევს, რომლებიც ვიბრაციის დროს ერთმანეთს ეხება. ასევე, შესაძლოა საკისრები იყოს გაცვეთილი და მათი ბრუნვა დამატებით ხახუნს ქმნიდეს. გაითვალისწინეთ, რომ თუ ტუმბო ზედმეტად ვიბრირებს, ეს მალევე გამოიწვევს სხვა ნაწილების დაზიანებასაც. ამიტომ, პერიოდულად გადაამოწმეთ ყველა სამაგრი და მოშვებული დეტალები კარგად მოუჭირეთ. დაზიანებული საკისრები კი, სასურველია, დროულად გამოცვალოთ, რათა პრობლემა არ გამწვავდეს.
ჰაერის ბუშტუკების წარმოქმნა
ტუმბოში წნევა თუ მკვეთრად დაეცემა, წყალში ვაკუუმი წარმოიქმნება და ჰაერის ბუშტუკები გაჩნდება. ეს ბუშტუკები დიდი სისწრაფით სკდება და ლითონის ნაწილებს ეჯახება, რაც თავად ლითონს აზიანებს. წყლის ტუმბოში ჰაერის დაგროვების ნიშანია ძლიერი ვიბრაცია და ისეთი ხმა, თითქოს მასში კენჭები ყრია. ამ პრობლემის თავიდან ასაცილებლად მთავარია, რომ სისტემაში წყლის დონე კრიტიკულ ნიშნულს ქვემოთ არ დაეცეს. ჩაძირული ტუმბოების შემთხვევაში, აგრეგატი წყალში საკმარის სიღრმეზე უნდა იყოს. კარგი გამოსავალია წყლის დონის სენსორების გამოყენება, რომლებიც ტუმბოს ავტომატურად გათიშავს მაშინ, როცა წყალი დააკლდება.
გაჭედვა და ბლოკირება
ეს პრობლემა განსაკუთრებით ხშირია იმ ტუმბოებში, რომლებიც არასასმელ, დაბინძურებულ წყალში ან კანალიზაციის სისტემებში მუშაობს. წყალში არსებული ნარჩენები, ცელოფნები, ხავსი თუ სხვა უცხო სხეულები, ხვდება იმპელერში და ბლოკავს მას. შედეგად ვიღებთ სურათს, როცა ძრავა მუშაობს, მაგრამ წყალი ვეღარ გადის. თუ ტუმბო ჩართულია, მაგრამ წყალი არ მოდის ან ნაკადი ძალიან სუსტია, სავარაუდოდ, ის გაიჭედა. ამ დროს აუცილებელია მოწყობილობის გამორთვა და მისი გაწმენდა: მოხსენით შემავალი მილები და შეამოწმეთ ფრთები. სამომავლოდ კი, უმჯობესია, შესასვლელში დამონტაჟდეს სპეციალური ფილტრი ან ბადე, რომელიც დიდ ნარჩენებს შეაჩერებს და ტუმბოს დაზიანებისგან დაიცავს.
საკისრების გაცვეთა
პრაქტიკა აჩვენებს, რომ ტუმბოს დაზიანების შემთხვევათა თითქმის ნახევარი საკისრების გაცვეთის გამო ხდება, რადგან ამ ნაწილს ყველაზე დიდი დატვირთვის გაძლება უწევს. თუ მას საპოხი (ზეთი) აკლია, მასში წყალი ჩავიდა ან ლილვი არ არის სწორად გასწორებული, საკისარი ძალიან მალე გამოდის მწყობრიდან. როცა საკისარი ზიანდება, იმატებს ხმაური და ვიბრაცია, საბოლოოდ კი ტუმბო საერთოდ ჩერდება. ამის თავიდან ასაცილებლად საჭიროა რეგულარული შეზეთვა და იმის კონტროლი, რომ ტუმბოს ღერძი გადახრილი არ იყოს. ეს მარტივი პროცედურები ტექნიკის სიცოცხლის ხანგრძლივობას საგრძნობლად ზრდის.
როდის მივმართოთ სპეციალისტს?
ფილტრის გაწმენდა, მოშვებული ჭანჭიკის გადაჭერა ან სისტემის ჰაერისგან დაცლა საკუთარი ძალებითაც შეგიძლიათ, თუმცა არის შემთხვევები, როცა საქმეში პროფესიონალი უნდა ჩაერთოს. თუ პრობლემა ძრავას, ელექტრობას ან შიდა მექანიზმების დაშლას ეხება, ჯობს რისკზე არ წახვიდეთ. „თერმოინდუსტრიაში“ კარგად გვესმის, რამდენად მნიშვნელოვანია სანდო ტექნიკა. ჩვენი გუნდი მზადაა, დაგეხმაროთ სწორი ტუმბოს შერჩევაში და მოგცეთ ყველა ის საჭირო რჩევა, რაც ტექნიკის ხანგრძლივ მუშაობას შეუწყობს ხელს.