როგორ შევარჩიოთ კედლის ქვაბი?

კედლის ქვაბის შერჩევა საკმაოდ რთული ამოცანაა.

მისი სიმძლავრის სწორ შერჩევაზე ბევრი რამ არის დამოკიდებული.

– აგრეგატის ექსპლუატაციის ხანგრძლივობა;

– შენობაში სითბური კომფორტი და ყოველთვიური დანახარჯები. ქვაბის შერჩევისას უნდა გავითვალისწინოთ 5 ძირითადი ფაქტორი.

პირველი – სიმძლავრე – ხშირ შემთხვევაში, მომხმარებელი ცდილობს დაამონტაჟოს იმაზე უფრო დიდი სიმძლავრის ქვაბი, რომელიც მის გასათბობ ფართს სჭირდება. საშუალოდ, 10 კვადრატული მეტრი ფართის გასათბობად 1 კვტ თბური ენერგიაა საჭირო. ეს ციფრი მიახლოებულია. რეალურად კი თითოეულ შენობას ინდივიდუალური მიდგომა სჭირდება. უნდა დაანგარიშდეს შენობის სითბოდანაკარგები და მხოლოდ ამის შემდეგ შევარჩიოთ ქვაბის სიმძლავრე.

მეორე – წვის კამერის ტიპი: კედლის ქვაბები არსებობს დახურული და ღია წვის კამერიანები. რა სხვაობაა მათ შორის. დახურული წვის კამერიან დანადგარს წვის კამერაში წარმოქმნილი ნამწვის  CO და NOx – ის ასარინებლად დამონტაჟებული აქვს ვენტილატორი. საკვამლე მილიც ორ ცილინდრიანია. შიდა ცილინდრით გამონაბოლქვი გაედინება, ხოლო გარე ცილინდრით საცეცხლე კამერა, წვისთვის საჭირო ჟანგბადს ღებულობს. ღია წვის კამერიან კედლის ქვაბებს ეს ვენტილატორი არ გააჩნია და გამონაბოლქვის გადინება ბუნებრივ გაწოვაზეა დამკოიდებული.

მესამე – კონტურების რაოდენობა: კედლის ქვაბები არსებობს ერთ და ორკონტურიანები. ერთკონტურიანი ქვაბი ემსახურება მხოლოდ გათბობის სისტემას. ორკონტურიანი კი ცხელწყალმომარაგებასაც. ანუ ერთდროულად გათბობის სისტემასაც და ცხელწყალმომარაგებასაც. ასეთი ქვაბები სასურველია, დამონტაჟდეს ისეთ შენობებში, სადაც სველი წერტილების რაოდენობა ორს არ აღემატება. მაგალითად სააბაზანო და სამზარეულო. თუკი შენობაში სველი წერტილების რაოდენობა უფრო მეტია, სასურველია, დამონტაჟდეს ერთკონტურიანი ქვაბი და მოცულობითი თბომცვლელი, ცხელი წყლისათვის.

მეოთხე – სამონტაჟო ტიპი: ქვაბები არის როგორც კედლის, ანუ კედელზე დასამონტაჟებელი, ასევე დასადგმელი ე.წ. სტაციონალური. ამ უკანასკნელში ძირითადად თუჯის თბომცვლელი გამოიყენება. ექსპლოატაციის ხანგრძლივობაც უფრო მეტი აქვს ვიდრე კედლის ქვაბს, სამაგიეროდ, ეს ქვაბები ღია წვის კამერიანებია და სამონტაჟო სივრცე გაცილებით მეტი სჭირდება ვიდრე კედლის ქვაბს.

მეხუთე – ფუნქციონალი: არსებობს ტრადიციული და საკონდენსაციო ქვაბები. საკონდენსაციო კედლის ქვაბი თანამედროვე და ეკონომიურია. თუკი ტრადიციული ქვაბის საკვამლე მილიდან გამონაბოლქვი უსარგებლოდ იკარგება, საკონდენსაციო ქვაბის საკვამლე მილიდან გამოსროლილი წარმავალი აირების ენერგია სასარგებლოდ გამოიყენება. შესაბამისად, საკმაოდ ეფექტური და ეკონომიურია. საკონდენსაციო ქვაბის მეორე უპირატესობა: ასეთი ტიპის ქვაბში გამოიყენება სანთურა, რომელსაც აქვს ალის მოდულირების საკმაოდ დიდი დიაპაზონი. აქედან  გამომდინარე, ქვაბს შეუძლია, იმუშაოს ნომინალური სიმძლავრის 10%-იან დატვირთვაზე, მაშინ, როდესაც ტრადიციული ქვაბისთვის ეს ციფრი 30%-ზე ქვემოთ ვერ ჩამოვა. კიდევ ერთი უპირატესობა: თბომცვლელი. საკონდენსაციო ქვაბების თბომცვლელები ძირითად შემთხვევებში უჟანგავი ლითონისგანაა დამზადებული. ტრადიციულ ქვაბებში კი – სპილენძი გამოიყენება.

გააზიარე

Share on facebook
Share on email